گیانباختکردن دو دۊیەت خوەندەوان کورد کرماشانی لە ڕۊداو هامشووێ سرویس مەدرەسە
گیانباختکردن دو دۊیەت خوەندەوان کورد کرماشانی لە ڕۊداو هامشووێ سرویس مەدرەسە
ساعەت 8:50 دەقەێ شەوەکی ئمڕووژ 17 مانگ سییەێ 1400 مینی بووس سرویس مەدرەسەێگ لە ڕێگەوبان هەڵەشی وەڕەۊ ماێەشت وەمدووێ تەقیاێن کامیوونێگ لە پێشت سەر وەقەێ مینی بووسەگە چەپە کریاس و لانکەم 20 مناڵ خوەندەوان سەرنشین مینی بووسەگە زامدار بۊن ک 2 کەسیان وە ناوەیل «موبینا مرادی» و «عەسەڵ ئەفوڤەت» تا ڕەسین ئامبولانس و بریان وە ناخوەشخانە گیان خوەیان لە دەس دان و بارودووخ دو کەس ترەکیش خراو ئێعلام کریاس.
یەکێگ لە خوەندەوانەیل زامدار وە هەواڵدەری «ئیسنا» وەتیە ک دوکوت مینی بووسەگە وەهووکار تەقیان وە قەێ کامیوونەگە تلیاس و 20 متر نواتر چەپ کردیە و دو کەس لە دووسەگانی ک لەی ڕۊداوە گیان خوەیان لە دەس دانە، لە سەندەڵی نوا پاڵ شوفێرەگە نیشتبۊنە.
یووسێف نووری وەزیر پەروەردەێ ڕژیم ئسلامی ئێران ک چەن ڕووژ پێش لە پارلمان کوومار ئسلامی ڕای متمانە وە پێ دریاس، ئێعلام کردیە ک وەخت نەیرێ ئەڕاێ سەرکیشی وەی ڕۊداو و ئامادەبۊن لە پرس و پووێ ئەی خوەندەوانەیلە تا کرماشان باێد!
«دەسغەیب» سەرووک پۆلیس ڕێگایل پارێزگاێ کرماشان تەمتەمەلۊلان و نێاشتن دید وە جادە لەلایەن شوفێرە کامیوونەگە مدووێ سەرەکی ئەی کارەسات مەرگبارە ئێعلام کردیە.
یە لە حاڵێگە ک دوچەوەکی و نایەکسانی فرە قۊل و دەرنەبڕێن ئمکانات ئەڕاێ شارستانەیل و ناوچەیل پەراوێزی لە ساڵەیل وەرین کارەساتەیل مەرگبار فرەێگ وە دی هاوردیە و خەوەرەیل فرەێگ لەباوەت قوومیاێن وە مدووێ ئەپرۊنگ بۊن سرویس مەدرەسەیل، ئاگرکەفتن وە مدووێ گەرمەوکردن کلاسەیل وە بوخاری نەفتی و تەنانەت مردن وە هووکار سەرما و هێرش گیانەوەرەیل وەحشی وە مناڵەیل ئاواییەیل لە ڕێگەێ مەدرەسە بڵاو کریاس.
ناو زامدارەیل و گیانباختکردییەیل کارەسات ڕێیەگەێ هەڵەشی-ماێەشت بریتی لە ژێرە: زامدارەیل: ۱. زەینەب ڕیزەوەندی، ۲. تارا ڕیزەوەندی، ۳. ستارە نامداری، ۴. دنیا قەمەری، ۵. نەرجس کەریمی، ۶. هانا ڕیزەوەندی، ۷. نیلۊفەر ڕیزەوەندی، ۸. مەهدیە تاماسبی، ۹. ستارە ئەفوڤەت، ۱۰. یەزدان فەتاحی، ۱۱. هانیە مەحموودی، ۱۲. ستاره ئەیوانی، ۱۳. سارینا جەمشیدی، ۱۴. پەریا لوتفی، ۱۵. زارا ڕیزەوەندی، ۱۶. ستاره ئەکبەری، ۱۷. سپێهر ئەیارە، ۱۸. نگین سەفەری
