کومیتەێ ئایینەیل و باوەرداشتەیل کۆدار: جەژن خاوەنکار، جەشن تێکووشاێن ئەڕا ئازادی و رزگاریە

بەیاننامەێ کومیتەێ ئایینەیل و باوەرداشتەیل کۆدار
جەشن خاوەنکار ئەڕاێ پەیرەوان ئایین یاری گشت ساڵێگ جوور نەماد ژیان ئەڕاێ ئازادی وەڕێیەو چوود. ئمساڵ پەیرەوان یاری لە حاڵێگ ئەی جەشنە وەڕێیەو بەن ک سەرھەڵدان ئازادیخوازی لە ڕووژھەڵات کوردستان و ئێران ھا لە ھەوراز و فرەتر لە پەنجا ڕووژە ک بەردەوامە. «کومیتەێ ئایینەیل و باوەرداشتەیل کوومەڵگاێ دمۆکراتیک و ئازاد ڕووژھەڵات کوردستان (کۆدار)» جەشن خاوەنکار وە گشت پەیرەوان یاری پیرووزبایی کەێدن.
پەیرەوان یاری گشت ساڵێگ جەشن خاوەنکار کەنە نەمادێگ ئەڕا ژیان ئازادانە. هاوکاتبۊن جەشن خاوەنکار ساڵ ١٤٠١ کووچی ھەتاوی وەگەرد سەرھەڵدانەیل ئازادیخوازانە لە ڕووژھەڵات کوردستان و ئێران بوودنە مایەێ وەھازبۊن ڕووح ئازادیخوازی خەڵقمان. جێ باوەرگومانی نییە ک وە ڕێزگردن لە ئەی نەریت زۊنە و دیرووکییە ک چەمک تێکووشاێن و کردار لەناو دڵی جێ دێرێ، گشت نەمادەیل فەرهەنگی لە ڕێیەگەی ئازادی مانا پەیدا کەن.
جەشن خاوەنکار جوور نەمادێگ ئەڕا فەرھەنگێگ ئازادیخواز و ژیانێگ بەختەوەرانە و وەئەرزشت، لە درێژایی دیرووک نیشاندەر بەردەوامبۊن تێکووشاێن کوومەڵگاێ زاگرۆسی ئەڕاێ ھەڵسازین ژیان ئازاد بۊە و ئمڕووژیش ھەر ھەڵگر ئەو مانای گەورەسە. کوومەڵگاێ وریاێ یاری لە درێژاێ دیرووک سەڵماندیە ک بەردەوام، جەشن‌ خاوەنکار ھە وە تەنیا جوور ڕۊداوێگ دیرووکی و نەریتێگ ئاسایی نیەنووڕێدن، بەڵکە ئەی جەشنە جوور ڕۊداوێگ دیرووکی زانێدن ک ڕێیەگەێ ئازادیخوازی و ڕزگاری لە ستەم و داگیرکاری وە خەڵق ژێر ستەم نیشان داێەس.
کومیتەێ ئایینەیل و باوەرداشتەیل «کوومەڵگاێ دمۆکراتیک و ئازاد ڕووژھەڵات کوردستان (کۆدار)» ھاوکات وە پیرووزبایی وە کوومەڵگاێ باغیرەت یارسان وە بوونەێ جەشن خاوەنکار، وە قۊلی باوەر دێرێدن ک پەیرەوان یاری وە پاراستن نەریت تێکووشاێن ئەڕاێ وەچنگ ھاوردن ئازادی تۊەنن ڕۆل دیرووکی خوەیان وە ئازایی و بوێری بازی بکەن. ھەڵسازین کوومەڵگاێگ ئازاد لە قۊلایی جەشن خاوەنکار نەھێنە و وە بێ باوەگومانی پەیرەوان یارییش تۊەنن وە یەکگردن وەگەرد گشت خەڵقەیل، سەرھەڵدان ئیرەنگەیی لە ڕووژھەڵات کوردستان و ئێران وەھازترەو بکەن. جەشن خاوەنکار جەشن تێکووشاێن، یەکێتی و ئازادی پیرووز بوود.
کومیتەێ ئایینەیل و باوەرداشتەیل کۆدار
۱۸ تۊلتەکن ١٤٠١