پلاتفۆرم یارسان: نەورووز یانێ سەرهەڵدان و دوجارە سەر لە نوو زنێ بیێن
نەورووز یانێ سەرهەڵدان و دوجارە سەر لە نوو زنێ بیێن
چیێن کڕیوەی زمسان مزگانی وەهار و چوکەرەدان سرووشت و هاتن نەورووز هاپێ. وەهارێگ کە سرووشت، سیپاڵ و دڵنگ نوو کەیدە وەر و روح دوجارە دەیدە هەستی. نەورووزێگ ک پەیام موبارزە ئەڕا ئازادی، عداڵەت، هاوژیانێ، هاوبەشی و سەرکەفتن ڕووژنایی وەسەر تیەریکی، بن کەفتن زاڵم لە وەرانوەر حەقخواز هاپێ.
نەورووز نەتەنیا وشەیگ بەڵکێ فەلسەفەی ژیان و نووەو کردن پەیمان وەگەرد بریار ژیان ئازاد و گەردیان ئەڕا حەقیقەت، نووڕستن و وەپێیاچیێن وە کردار یەی ساڵ ویەردە و هەنگاو هەڵگردن وە ناو بڕیار نوو موبارزە و ژیان. ژیانێگ ک گشت مرووڤەگان باوەر وە هەبۊن و ئرادەی خوەیان داشتۊن و بتوانن لە میلکان خوەیان لە کوومەڵگەیگ ئازاد و دمۆکراتیک بژیەن.
لە ساڵێگ ک نایمنەی پشت سەر تەجروبەیل فرەیگ لە ناو موبارزە و ژیان وەدەسهاوردیم، تەجروبەیلێگ ک توانێ دەسمیەتدەر هەڵگردن هەنگاوەیل کرداریتر وەرەو ئازادی بوود. ڕێپەیوانی ئازادیگیش ک وە دریژایی ساڵەیل وەرین هەنگاوەیلێگ هەڵگردیە، ئێرنگە لە هەر وەختێگ فرەتر وە ئاماج نزیک بیەسەو. ئی ساڵیشە کەسەیلێگ وە شیوەی فیزیکی لە ناومان چین و دوون نوو هەڵوژانن. لە پاڵ ئیەیشە هەمرای ڕووڵەیلمان لە ژێر چنگ و سیاچاڵەیل زەهاکەیل دەورانن و نیشتمانمان، تاریکی باڵ کیشاسە سەرێ. ئیانە گشت پەیام نەوسیان و بێ وچان درێژە دان وە موبارزەی کاوەی ئاسنگەرەگان ک ئمڕوو خوەی لە ئنقڵاب ژن ژیان ئازادی نیشان داس، دەیدە پێمان.
وەجوور پلاتفۆرم یارسان پیرووزبایی هاتن نەورووز لە نەتەوەی کورد، زاگرۆسیەیل، موبارزەیل ئازادی، ڕێبەر ئاپۆ، داڵگ شەهیدەیل، داڵگەیل ئاشتی و گشت کەسەیلێگ ک نەورووز پیرووزە کەن، ئعلام کەیم. موبارزەی هاوبەش و باوەر وە ئرادەی جەوهەری خوەمانە ک توانێ وە ئازادی بڕەسنێدەمان.
پلاتفۆرم یارسان
٢٩ ڕەشەمەی ٢٧٢٤ کوردی
