ئەگەرێ فرەس هێرش سەر سوهەیلا داوودیان کەلهور لە شار ستۆکهۆڵم لە لایەن رژیم ئێران بووت
![](https://usercontent.one/wp/www.yarsan.info/wp-content/uploads/2020/07/1595768855169-1024x1024.jpg)
ئەگەرێ فرەس هێرش سەر سوهەیلا داوودیان کەلهور لە شار ستۆکهۆڵم پایتەخت سوئد لە لایەن رژیم ئێران بووت
لە گوفتگوێگ ک سایت یارسان وەگەرد سوهەیلا داوودیان کەلهور لە بارەی هێرشێگ ک دۊەکە کریاسە سەرێ ژمارێگ پرسیار بێ جواو وڵام دریاسوە.
بەڕێز سوهەیلا خەوەرەیلێگ وڵا بیە ک باس لە هێرشێگ لە لایەن رژیم ئێران وە سەر ماڵ ئیوە کەید، ئیە چجووری بیە و کەی رۊداس؟
دۊەکە شەو ساعەت ٠١:٠٠ (بامداد شنبه) وەختێگ ک گشتمان لە ماڵ خەفتۊمن لە ناکاو دەنگ تەقین گەورایگ لە ناو تراس ماڵەگەمان هات و ئەو ناوە ئاگر گرت، ئیمە هەنگەوپەڵە زەنگ دایمنە پولیس و چیمن سەیر کردیم ک بزانیم چە بیە و ئاگرەگە بکوشنیمنوە.
ئایا وەرجە ئیە پەیوەندیگ وگەرد ئیوە گریاس ک هەڕەشە وەلێتان بکریەد؟
ماوەی فرەتر لە ١٠ ساڵە وەردەوام لە ژێر هەڕەشەم و پەیام و قسەیل هەڕەشەئامێز ئەڕام تێ وە جاران لاسیک تایر ماشینم دڕاننە و کارەیل هاوشیوە ئەنجام گردیە، تا ئیەیکە لە ناو هەفتەی وەرین ئی هەڕەشەیلە فرەتر بیە و سێ رووژ وەرجە ئیسە وە شومارەیگ نەناسریای پەیوەندی وەگەردم گریا و وەتن ک وەی زۊ لە لایەن ئێران لە ناو چید ک ئی هێرشە ئەنجام گرت.
مدوو ئیەیگە لە شوون فرەتر لە دە ساڵ ئیجوور هێرشێگ ئەنجام گرێ لە چە دۊنیدەی؟
لە ناو ماوەی وەرین وە مدوو ئەوەیگە جوانەیلمان ئێدام کریان قسە و گوفتگوەیل فرەیگ ئەنجام دامە دژ وە رژیم ئێران و ئەو سیاست رژیم وە تونی شەرمەزار کردمە و دایمەن باس وەسەرێ کردمە، ئەگەرێ فرەس ک مدوو سەرەکی ئیە بووت. من هۊچ ترسێگ لە رژیم داگیرکەر ئێران نەیرم و تێکووشان خوەم درێژە دەم.
ئایا تا ئیسە دیار بیە ک کار کی یا چ کەسەیل و لایەنێگ بیە؟
نە هەتا ئیسە دیار نەویە ک کار کی بیە، ئەمانێ بڕێگ چشت بی ک پولیس دێرێ لە بانێ مینەوانێ کەید و مێنەوانی پولیس درێژە دێرێ، من لە سەر ئەو باوەرەم ک کار رژیم داگیرکەر ئێران.
جێ وە وێر هاوردنە ک سوهەیلا داوودیان کەلهور خەڵک پاڕێزگای کرماشان رووژهەڵات کوردستان و ئەندام وەڕێوەبەری پارت دموکرات مەسیحی(Kristdemokraterna) سوئدە ک ساڵیانە لە ناو کار و خەبات سیاسی وڵات سوئد و حزبەگەی جێ گردیە.