سەی خەلیل حوسەینی لە بازداشتگای ئدارەی ئتلاعات رژیم داگیرکەر ئێران وە سەر بەید

وە پەی خەوەرێگ ک ئەڕا سایت یارسان هەناریاس، چالاک مەدەنی کورد لەک سەید خەلیل حوسەینی لە رووژ سێ شەمە لە پەیوەندێگ تلفونی ئاگادار ماڵ خوەیان کردیە ک لە لایەن هێزەیل ئدارەی ئتلاعات رژیم داگیرکەر ئێران دەسگیر و لە ئوتاقەیل تاکەکەسی ئدارەی ئتلاعات رژیم لە مەیدان نەفت کرماشان وە سەر بەید.

سەرچاوەگە ئێلام کرد هەتا ئیسە وە رۊنی دیار نیە وە چ تومەتێگ سەی خەلیل دەسگیر کریاس ئەمانێ گومان ئەوە کریەد وە مدوو پشتیوانی لە زندانییەیل سیاسی، بڵاو کردن خەوەرەیل گیان وەدەسداگەیل سەرهەڵدانەیل ١٣٨٨، ١٣٩٦ و ١٣٩٨ و گوفتگو وەگەرد رەسانەیل دەسگیر کریایۊ.

سەید خەلیل حوسەینی لە خانەوادەیگ  هونەر دوس و نیشتمان پەروەر لە داڵگ بیە و  چالاکیەیل ماف مروڤی و مەدەنی ئەنجام داس.

جێ وە وێر هاوردنە، رووژ دو شەمە ئی هەفتە سەی خەلیل حوسەینی لە چالاکەیل مەدەنی و ماف مروڤ کوومەڵگەی یارسان و کورد لەک نیشتەجێ مەحلەی جەعفەرئاواێ کرماشان لە وەخت چینە دەیشت لە ماڵ، وە ناو خیاوان لە لایەن هێزەیل ئەمنیەتی رژیم داگیرکەر ئێران لە کرماشان دەسگیر کریاس.

ماوەیگە رژیم داگیرکەر ئێران لە شارەیل رووژهەڵات کوردستان دەس کردیەسە دەسگیریەل هەڕەمەکی و ژمار فرەیگ لە چالاکەیل بوارەیل جیاجیا وە تومەتەیل بێ بنەوا دەسگیر کردیە.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *