کۆرۆنا و ناکارئامەدی دەولەت ئێران گیان مەردم دهستان یارسان نشین بان‌زەردە خستیەسە خەتەر
وەپای خەوەرێگ ک وە ماڵپەر یارسان رەسیە، دوشەمە ١١ خاکەلێوە تست کۆرۆنای چەن کەس لە مەردم ئاوایی زەردە سەر وە شارسان داڵاهوو ئیاڵەت کرماشان موسبەت بیە.
موسبەت بیێن تست کۆرۆنای مەردم ئاوایی زەردە لە حالێکەس ک فرەتر لە ٢٠٠ نەفەر مەردم ئەو ئاواییە تۊش بی مادەی شیمیایین و لە خەتەر جدی قەرار دێرن.
کەسەیل تۊش بی وە مەواد شیمیایی وە خاتر ئەوەیگە دەزگای هەناسە کیشانیان لەتمە دیە و کزە، کەم هازتەرین کەسەیلن لە وەرانوەر ویرۆس کۆرۆنا و ئی ویرۆسە دەزگای هەناسە کەیدە ئاماج و وە ئی مدووەسە ک کەسەیل تۊش بی شیمیایی گیانیان لە خەتەرە.
تۊش بیەیل ئیسەی ئاوایی زەردە لە وەختێگەس ک ماوەیگ وەرجە ئیسە یەکێک لە خانەوادەیل ئی ئاواییە ئەڕا دەرمان چوودە تەیران و لە ئەوردا یەکێگ لە ئەندامەیل خانەوادەی تۊش کۆرۆنا بووت و گیانێ وە دەس دەید ک نەخوەشخانە ئەوە وە تاویل ناگرێد و خانەوادە و مەردم ئاوایی هەڵێگەردنن ئەڕا دهستان بان بان‌زەردە و خاکسپاری کەن و ئەگەرێ فرەس وە مدوو نەوین وەسیلەیل ئیمەنی ئەڕا پارێزیان مەردم لە تۊش بیێن وە ویروس کۆرۆنا لە خاکسپاری ویروس کۆرۆنا وڵا بیە.
جێ وە وێر هاوردنە، ئێرەنگە ٣٨٠ خانەوادە یانێ ١٣٨٠ کەس لە ئاوایی زەردە ژیان کەن و لە ٣١ پۊشپەر ١٣٦٧ هەتاوی لە دوای ئەوەیگە چەن رووژ لە ئاگربەس ناوبەین رژیمەیل ئێران و ئەراق گوزەریاوی رژیم بەئس ئەراق وە پەنج بوم ئەفکەن هێرش شیمیایی کردە سەر ئاوایی زەردە و تەواف چییەل بارگایەیل زیارەتی باوەیایار و وەرگومە ک لە ئاکام هێرشەگە ٢٧٥ کەس گیانیان لە دەس دان و ١١٤٦ کەسیش زامدار یا ک تۊش بی وە مەواد شیمیایی بین.
