ئەشکان ئەزیزی و کرماشان؛ رووژ سەنجاوی
ئەشکان ئەزیزی و کرماشان؛ رووژ سەنجاوی
ئێوارەی رووژ پەنجشەمە ٢٤ رەزبەر(مێهر) هێزەیل نزامی رژیم ئێران لە رێ چل متری مەحەلەی دەوڵەت ئاباد کرماشان وە بێ کووم ماشینێگ پژو ٤٠٥ گرنە وەر دەسرێژ گولە ک لە ئاکام ئی هێرشە دو نەجوان ١٧ ساڵە وە ناوەیل ئەشکان ئەزیزی( اشکان عزیزی ) و بورهان ئەزیزی( برهان عزیزی ) گیانیان وە دەس دەن و زامدار بن.
نەوجەوان ئەشکان ئەزیزی دەرجا گیانێ وە دەس دەید و بورهان ئەزیزی ک گولە داس لە باڵێ زامدار بوود و لە دوای دەمێگ هەنێریەدە نەخوەشخانەی تاڵقانی شار کرماشان و چوودە ژێر چەودێرێ پزشکی ئەمانێ لە دەر ئوتاقەگەی هێزەیل رژیم داگیرکەر ئێران دانریەد تا ک لە ژێر چەودێرێ و دەسرەسی ئەوان بوود.
لە وارەی چوینیەتی رۊدان ئی رۊداو دڵتەزنە و رەوش کرماشان خەوەررەسن سایت یارسان لە کرماشان وە پەی پرسیار و گوفتگوەیل ک ئەنجام داس زانیاریەل نووێگ وە دەس خستیە.
ئێوارەی رووژ پەنجشەمە لە وەختێگ ک هێزەیل رژیم داگیرکەر ئێران خوازیار وسیان ماشین پژو ٤٠٥ێگ ک ئەشکان رانەندەی بیە بینە، ئەشکان وە مدوو ئەوەیگە ١٧ ساڵێ بیە و گەواهینامە نەیاشتیە، هەوڵ بووت و لە پولیس رەد کەید ک لە شوونێ سورعەت کەم کەد و تواد بیەدە لا لە پشتەو هێزەیل گەشت ئنتزامی رژیم ئێران ماشینەگە دەنە وەر دەسڕێژ گولە ک ئەشکان وە مدوو خواردن گوڵە لە ناو دڵێ گیانێ وە دەس دەید و بورهانیش زامدار بود.
هێزەیل رژیم ئدئای ئەوە کەن ک ماشینەگە پلاک نەیاشتیە ئەمانێ شایەت و وێنەگان باس لە ئەوە کەید ک پلاکەگان لە نوا و دۊای ماشین لە پشت شیشەگان “پلاک ماشین” دانریاس. وە پەێ قسەگان تورەج ئەزیزی باوگ ئەشکان ماشینەگە نوو سەندیەسەی و وە تەمای ئەوە بیە لە رووژەیل بانان بچوود و پلاک ماشینەگە بکەید ک ئیجوور رۊداوێگ قومیاس.
یەکێگ لە ئاشنایەیل ئەشکان وەت: وەختێگ ئی رۊداوە قومیا هێزەیل گەشت ئنتزامی رژیم تواتوین ماشین ئەشکان وە بێ ئەنجام دان هویچ جوورە ئقدامێگ وە بی دەنگی بوەنەی پارکینگ و مەواد موخەدر وە ناوێ جاسازی بکەن، ئەمانێ خوەشبەختانە کەسەیلیگ ک لە ئەوردا بۊین ئجازەی ئەوە نەیاوین و وەتوین ک بایس کارناسەیل بان ئیە بوینن و سورەتجەلەسەی بەکن و دۊایی بووڕیەدە پارکینگ.
ئەو جوورەیگە باس کریەد وەختێگ ک بورهان ئەزیزی کوڕ بێژەن لە نەخوەشخانەی تاڵقانی خەفیاس و ئجازەی دیدار وەگەردێ نەیریاس و لە لایەن هێزەیل رژیم لە ژێر چەودێری بیە و نەوجوانەیل و دووسەیل بورهان دژ وە ئیەکردەوە لە وەردەم نەخوەشخانەگە ناڕەزایەتی نیشان دانە ک وە هەڕەشەی هێزەیل رژیم رۊوەرۊ بینە و وەتنە: ئیمە حەق تیر دێریمن و وەکارێ بەیمن لە ئەگەر درێژە داشتن ناڕەزایەتی نیشاندانتان. بورهان ئەزیزی لە شوون چارەسەری رووژ شەمە لە نەخوەشخانه تەرخیس بوود و چوودە ماڵ خوەیان.
ئەشکان ئەزیزی نەوجوانێگ وەرزشکار و نیشتمان دووس بی ک فرەتر وەختێ لە تووپان و وەرزشەیل تر وە سەر بردیا. ئەشکان و بورهان ئەزیزی وەگەرد یەک ئامووزان و مناڵ ئاوایی گردەکانە کور لە خێڵ قورێ هەرێم داڵاهوو بینە ک ماوەیگە خانەوادەی کوچ کردنەسە شار کرماشان.
دریانە وەر دەسرێژ گولە ماشینێگ لە ناو شار کرماشان هەڵەوگەردێ ئەڕا فەزای ئەمنیەتی و ملیتاریزەیگە ک لە شار کرماشان دورس کریاس.
ماوەی مانگێگە ک شار کرماشان رییەیل دەرچیێن و هاتن وە شار لە لایەن هێزەیل گەشت ئنتزامی و ئتلاعات کونترول کریەد و ماشین و کەسەگان وشکنن. لە ئی ماوە شەوانە لە سەر هەر کام لە ئەو رێیەیلە لە ناوبەین چوار ماشین گەشت و ئتلائات هەتا ٢ دوماشین جێ گرن. هێزەیل گەشتی رژیم لە سەر رێیەگان وە وسانن ماشین مەردم، ناو ماشین وشکنن و هێزەیل ئتلائاتی نووڕنە ناو موبایل ئەو کەسەیلە ک هەمیشەیش بەڵگەی دادگا دێرن ئەڕا نووڕستنە ناو موبایلەگان.
