ئاخرین زانیاریەگان لە وارەی ئتفاق ئمڕوو لە ئاوایی قەڵاواری؛ رووژ سەنجاوی

ئاخرین زانیاریەگان لە وارەی ئتفاق ئمڕوو لە ئاوایی قەڵاواری؛ رووژ سەنجاوی

وە پەی خەوەرێگ ک ئەڕا سایت یارسان هەناریاس، ئمڕوو ساعەت ١٦:٠٠ دو موتور سوار وە دەم و چەو پیچیاگ هاتنەسە وەرانوەر ئاوایی قەڵاواری و سوپرمارکت ئاوایەگە گردنەسە ڕەگبار ک ئی هۊژمه بیەسە مدوو زامدار بیێن یەی کەس وە ناو زەفەر کەرەمی کوڕ ئەڵاوەخش.

زەفەر کەرەمی ئێرەنگە لە نەخوەخشخانە(بیمارستان) شار حەلەوان خەفیاگە و وەزعیەت سلامتی خاسە

.سەرچاوەگە وەتگە، خوەشبەختانە پزشکەیل وەتنە زەفەر سلامەتی خاسە و هۊچ جێ نگەرانی نیە.

ئەو سەرچاوە وەتگە ک لە ناو رووژەیل وەرنگ و تایوەت دۊیەکە لە بەین مەردم قەڵاواری و ئەلیاسی لە سەر جاڕ بیەسە دەمەقسەیان ک وە ناوژیگەری گەوراگان و کەسەیل ئاشتی خواز ئی ئاژاوە خەفتیە تا ئیەیگە ئمڕوو لە لایەن ئەو دو موتور سوارە ئی جوور هۊژمێگ کریاگەسە سەر مەردم ئاوایی قەڵاواری.

وە پێمان وەتریاگە ک کەسەیلێگ ک ئەو هیرشە ئەنجام دانە شناسایی بینە و لە وەخت ئەو هۊژمە مەردم کەسەگان ناسینە.هەرلەیوا دو کەس لە کەسەگان ک هێرش کردنە لە دوای چەن ساعەت دەسگیر کریانە.

جێ وە وێر هاورنە لە دوای ئتفاق رووژ ١١ جۊیەزەردان/خرداد ناوچەی داڵاهوو تۊش ئاڵووزی بوگە و ئەڕا جیاکاری لە ناوبەین مەردم سونی و یاری چەن سناریو هاوشیوەی تەقەی شەوانە، خەوەرەیل دۊر لە راسی و هۊژم کەسەیل نەناس ئەڕا سەر کشاوەرزەیل لە لایەن باڵ و جیرەخوەرەیل رژیم ئێران ئەنجام گردگە. هووشیاری کوومەڵگە توانێ ئیجوور پلانەیلێگ لە لایەن رژیم ئێران پۊچەڵ بکەید و هاوژیانی مەردم درێژە داشتۊد.