پلاتفۆرم یارسان: ڕووژ ژینگە و ساڵڕووژ شەهیدەیل ژینگەی ڕووژهەڵات کوردستان بەرز ڕاگریمن
ڕووژ ژینگە و ساڵڕووژ شەهیدەیل ژینگەی ڕووژهەڵات کوردستان بەرز ڕاگریمن
دو ساڵ لەیە وەر، لە ڕووژ ٣ خەرمانان ساڵ ١٣٩٧ هەتاوی بەش فرەێگ لە ژینگە و دارسانەیل دەوروەر شارسان مەریوان وە شیوەێگ گوماناوی ئاگر گرد، ک ئەندامەیل «ئەنجومەن ژینگەپارێز سەوز چیا»ی مەریوان دۊاێ ئاگادار بین لە رەوشەگە خوەیان رەساننە شوون ئاگرکەفتنەگە؛ بەڵام لە وەخت تەقەڵاێ چالاکوانەیل ژینگە ئەڕا خاموش کردن ئاگرەگە، چوار ژینگەپارێز وە ناوەیل «شەریف باجوەر»، «ئومید کۆنەپووشی»، «ڕەحمەت حەکیمی نیا» و «موحەمەد پەژووهی» وە شیوەێگ گوماناوی گیان خوەیان بەخت کردن.
ئیمە جوور پلاتفۆرم یارسان وە بوونەی دۊیەمین ساڵڕووژ شەهید بین چوار چالاک ژینگەپارێز مەریوان ک لە وەخت کوشانن ئاگر ژینگە گیانیان بەخت کردن، سەرخوەشی لە خانەوادەگانیان، خەڵق مەریوان و ڕووژهەڵات کوردستان کەیم و وەی باوەریمن ک وە دڵنیاییەو دوون نوویان تەکمیلکەر تێکووشان دوون وەرینیانە. ئەی شەهیدەیل نیشانەێ بەرز وڵاتپارێزی و ئنساندوستی لە ئاست کوردستان بین، و هەرکامیان سەمبوڵێگ ئەڕاێ گەل کورد و وە تایوەت جوانەیل کورد و گەلان ترەک ئێران بۊن. ئەی شەهیدەیل وە چالاکی و بەشداری خوەیان لە ڕێکخستن ئەنجومەنەیل لە ئاست ڕووژهەڵات کوردستان و ئێران، مەرزەگان بەزانن و رێ ئەڕا ژینگەپاریزی واز کردن.
شەریف باجوەر، چالاک ماف بەشەر و ژینگەپارێز ناودار ڕووژهەڵات کوردستان و ئێران، ئومید کۆنەپووشی و رەفیقەیلیان ئەو چوار چالاکە بین کە لە ناو ئاگر سزیان و گیان خوەیان فەدای ژینگە و سروشت نیشتمان کردن.
هاوڵاتیەیل لە رووژهەڵات کوردستان هەر ساڵان وە خاتر سیاسەت و کەمتەرخەمی رژیم داگیرکەر ئێران تۊش رۊداوەیل تاڵ و دڵتەزن بوون. شەریف باجوەر ژیان خوەی وە بێ چەوەنووڕی و ئەرک سەرشانێ تەرخان کردۊ ئەڕا گەلەکەی، وەجووری لە گشت رۊداوەگان سروشتی، کارەساتەیل ترەک پێشەنگ گەل مەریوان و خەڵق ڕووژهەڵات بی و بەردوام هاوکاری گەلەکەی کرد و خەم خوەر مەردم بی.
شەهید شەریف باجوەر و ئومید کۆنەپووشی، لە وەخت زەویلەرزەی ماڵ وێرانکەر ساڵ ٩٦ ئوستان کرماشان کە گەل کورد داخدار کرد، لە یەکم کاروان و لە یەکمین کەسانێگ بین ک لە مەریوان خوەیان رەساننە سەرپێڵ‌زەهاو، و وە دڵ داخدارەو شەو و ڕووژ هاوکاری خەڵق کردن.
ژینگەی ئێران و وە تایوەت ڕووژهەڵات کوردستان هەر ساڵان تۊش موشکل بوود ک بەش فرەێگی وە خاتر کردەوەیل رژیم داگیرکەر ئێرانە، ک ئەڕا لە ناو بردن ژینگەێ ڕووژهەڵات لە هۊچ کارێگ دەرێخ ناکەی، خەڵقمان لە ڕووژهەڵات لازمە لەیە حالی بوون کە هۊچ کام لە پروژەگان رژیم لە ڕووژهەڵات بێ بەرنامە و پیلان نیە.
چونکە ڕووژهەڵات کوردستان وە سالانە وە خاتر سیاسەت و کەمتەرخەمی رژیم داگیرکەر ئێران تۊش رۊداوەیل تاڵ و دڵتەزن بوود، ئیمساڵیش وە جوور ساڵەیل وەرین، سروشت و ژینگە و خەلە و خەرمان ڕووژهەڵات کوردستان بەردەوام وە شیوەی گوماناوی ئاگر گرد و هەر ڕووژ شایەت ئەی کارەساتیمە، کە رژیم و مەزرینگەیلێ هۊچ کارێگ ئەڕا کوشاننێ ناکەن و ئیە نیشان دەێد ک ئامانج رژیم بجگە کاولکاری چشتێگ نییە. بەڵام لە وەرانوەر کەمتەرخەمی رژیم، چالاکەیل ژینگەپارێز و خەڵق مەدەنی وە دەس چووڵ لە تێکوشان ئەڕا پارێزین ژینگە بەردەوامن.
ئیسەیش لە وەختێکا ساڵیاد شەهیدەیل ژینگەێ مەریوان بەرز ڕاگریمن، ڕووژ ٥ پۊشپەر ئیمسال ١٣٩٩، بەرزاییەگان ناوچەیل بووزین و مەڕەخێڵ شارسان پاوەی هەورامان ئاگر گرد، ک لە شوون چەن ڕووژ تێکوشان چالاکەیل، ڕووژ ٨ پۊشپەر سێ چالاک ژینگە پارێز وە ناوەیل «موختار خەندانی» خەڵق نەوسوود، «بەلال ئەمینی» خەڵق ئێناخی و «یاسین کەریمی» خەڵق پاوە لە وەخت خاموش کردن ئاگرەگە گیان خوەیان فەدای ژینگەێ ڕووژهەڵات کردن.
هەلەێوا جێ دێرێد لە ئسماعیل حەمیدیان ئازادیخواز و چالاکوان کورد خەڵق ئیلام یاد بکەیمن ک لە نەوڕووژ ئمساڵ لە کۊیەێ مانشت لە حاڵێ ک سەرقاڵ کاڵین دار بی، تۊش قوومیاێن بی و لە سەر تاشەگان مانشت داکەفت و گیان خوەی وە خەڵقی پێشکەش کرد.
هەلەێوا ئاگرکەفتنەیل ئمساڵ لە ناو خەڵق لوڕ لوڕستانیش دو کەس لە جوانەیل نازار ئەو مەڵوەنە قوروانی خوەی کرد. «ئەلبورز زارعی» شاخەوان و ژینگەپارێز خوەبەخش ک ئەڕا کوژانن ئاگر دارستان دیل لە گەچساران چیۊە ناو دڵ ئاگرەگە، تۊش سزیان فرە قۊلێگ بۊ و گیان خوەی ئەڕاێ سروشت و ژینگەی و ژیان خاستر خەڵقی فدا کرد. بجگە ئەۊ، «محەمەدجواد موختاری» ژینگەپارێزێ ک تاوسان ئمساڵ خوەبەخشانە لە کوژانن ئاگر دارستانەیل ناوچەێ نۊرئاباد مەمەسەنی بەشداری کردۊ، توش سزیان بی و گیان خوەی فدا کرد.
لە مانگەیل دۊایی کومەڵگەی دموکراتیک و ئازاد ڕووژهەڵات کوردستان لە سێوەمین کۆنگرەی خوەی، ڕووژ سێ خەرمانان سالڕووژ شەهید بین شەریف باجوەر و رەفیقەیلێ وە جور ڕووژ ژینگە لە ڕووژهەڵات کوردستان ئێعلام کرد، ک ئیمەیش وە جوور پلاتفۆرم یارسان پشتیوانی خوەمان لەو بڕیارە ئێعلام کەیم.
وە جوور پلاتفۆرم یارسان جارێ ترەک پرسە و سەرخوەشی خوەمان ئاراستەی بنەماڵەی شەهیدەیل کەیم و داوا لە خەڵقمان لە ڕووژهەڵات کوردستان کەیم، وە پشت بەسان وە یەکتر ئەڕا پارێزین ژینگە و سروشت خوەیان وە ئاگاییەو کار بکەن و رێ گشت شەهیدەیل درێژە بیەن.
پلاتفۆرم یارسان
