شوون پای سوورد ئەڕای هەرایهەر لە سەر خاک ئێ وڵاتە مینێدە جییەو؛ ڕێ‌هەڤاڵ شەهید ڕێزان جاوید
شوون پای سوورد ئەڕای هەرایهەر لە سەر خاک ئێ وڵاتە مینێدە جییەو؛ ڕێ‌هەڤاڵ شەهید رێزان جاوید
ڕاوهات من و ئێ نۊسینە، ڕاوهات تن و چەوەیل سەوز تێکووشاندە! ڕاوهاتێگ نییە ئەڕا ستایش‌کردن ت، بەڵکوو نۊسین ڕاسیی هەبۊندە، هەڤاڵ هەمیشە جاویدان و زینێ! ڕاوهات، ڕاوهات داڵگێگە ک شێعر خوەنێد و ملێ بەرز گرتێیە و فەرمان بەیدە پیم، هەرئەو داڵگە ک رێ ڕەسین وە رێزان ئێ نیشتمانە نیشان دایە، ک ئیسە وەئەو وشە و وتەیلە وەسفێ کەد… ڕاوهات من و ئێ نۊسمانە، ڕاوهات ئەو داڵگەسە ک ت وە خاک نە، بەڵکوو داسەدەو دەس دیرووک و یادەوەری و هۊرمان ئێ نەتەوە، ڕاوهات داڵگێگە ک گریانەگەى لە سۊک چەوەیلێیا ئەوشارێ ک هاتێ بوودە ئاوێگ و بکریەدە مل ئاگر دڵێیا. ڕاوهات ئیمە هەرئەو قەڵخان ئاسمان کەوەسە، ک نرکەى ئەور خەیاڵەیلێ گرتێیەسە کووڵەو. ڕاوهات من و ئێ نۊسینە، ڕاوهات ئەو بار قورسەسە، ک خسێیەسە سەر شانمان و ئەو قەوڵ و پەیمانمانیشە ئەڕا هەرایهەر مینێد… ئەیەیشە یانێ شوون پای سوورد ئەڕای هەرایهەر لە سەر خاک ئێ وڵاتە مینێدە جییەو…
هەڤاڵ رێیەیل دۊر و نزیک
ئێرە کوردستانە، قورسایی و چڕی تێکووشانِ ئازادیخوازانەگەى، وە رح و هۊر و شێوەی هەر شووڕشوانێگەوە هس کریەد. تەقەلایگ وە باکگراوند دیرووکی، کوومەڵایەتی و ڕۆشنهۊریێگ زەنجیر درس کەد، زەنجیرێگ، ک لە تەور خیانەت لە ئەمان نییە، ئەمانێ تا ئەمڕووای‌ئمڕوو هاتێیە. زەنجیرێگ، ک ئەڵقە ئەڵقەیلێ بوو شووڕش و ئومێد لە لێیان تێ! زەنجیرێگ، ک لەو دیم سنوورەیل مەکانی و زەمانی ت وە دۊەکە و ئمڕوو و بانان پەیوەند دەد. سەیرکە، پەیام ت لەی ڕەوەند دیرووکییە چەنێگ قورسە؟ سەیرکە بەیداخ‌هەڵگری ئێ رێیە هەر وە خوەد کەفێ و ئیمەیش سەرسام تنیمن… دەسخوەش ئەڕا ئێ زەنجیرە ک رێ نیشاناندەرمان بۊ. رێیێ ک ڕێوار و پێشەنگ خوازێ. ئاخر چۊن بوود هەڵوژین ناوەگەد وە بێ‌مدوو بوود؟ بێگومان نیەکریەد ک پەیوەندی وە گوفتار و کرداردەو نەیاشوود؟ ئاخر ت پشت وەی زەنجیرە بەساۊد و لەیوایشە بۊ ئەو زەنجیرەیشە وە ت دڵنیا بۊ و مەشخەڵ رێ دایەو دەسد. خوەی خاس زانی لەسەر رێگەد ناهاواری و کوچگ فرەیگ هەس، بایەس گامەیل رێ‌کردن و چێیند ئێقەرە هازدار و قورس هەڵگری ک یەکە یەکە بووڕیدان و بیلیدانە جییەو! خوەدیش خاس زانید ک دڵنیایی و ئێعتمادِ ناوەی من و تن و گشت هاوڕێبازەیلد، بار ئەمانەتێگە ک جبرانەو نیەود. سە بایەس وە رێیێگا بچیاتیاتای، ک هەرکەسێگ نەتوانێ بووڕێدەی!
وە پیمان بۊش هایدە شوون چەوە؟ بچڕەم تاگەرێ وەگەرد تنا پەیا بکەم! بنووڕ چ ڕاوهاتێگ ئەڕامان نایدە یەکەو!
ڕاوهات، تۊەم دڵ خاک، هەرچێ خوەڵ و خاک بکەنە ملێیا، هەر چەکەرە کەد و پەلوەچ کیشێد و سەر دەرتیەرێد و ئەوزینە کەد، پەلوەچێگ ک دڵ خاک ناچار وە ڕپەڕپ و لێدان کەد. وە داڵگد ئۊشم، وژە وە وژەی خاک گەرم مەهاباد بوو بکەد، ئڕایەگ بوو قامیشلۆ و بوو شنەى شووڕشە لێ تێد! وە داڵگد ئۊشم، وەئەو پەڕ غروور و شانازییەو ئیسفای چین و لووچەیل دەمچەوی بگرێ، ڕووڵەگەى لەی هاوار هاوارەی جەنگ و کیشمەکیشەیا چەنێ ئاسوودە چێیەسە ناو دڵ ڕۊداوەیلەو و گشت نائارامیەگان دنیا لە ناوێیا ئارەمیانە! وە پێ ئۊشم، ک کڕ وە کڕ دەمچەود خوەنم و پەیامێگ ها تێێان، چەنێگ ئاسوودە و ئارام، هۊرمانەیل تەڕ زێد و میلکان دەیدەو دەس تاریخ! وە پێ ئۊشم، منیش داڵگێگ وەک ت توام! داڵگێگ، ک رێزان بارێدە دی، داڵگێگ، ک سەر چیایل قەندیل و لێو کیەنی‌ئاوەیل کۊەسان ماچ بکەد! داڵگێگ، ک وە گامەیل ئارامێیەو گەیشت‌وگێڵ بکەد وە ناو مێژگ و زەین گشتمانا! داڵگێگ، ک شەپوول و لەپدان دەنگێ پڕایپڕ لە ئاواز و زایەڵە، لەرزە بخەدە سەر جەسەى هەرچێ دیوار بێ‌بنەوایا! داڵگێگ، ک ئێمە وە موور و ت وە خوەر بچڕێ! داڵگێگ ک لە عشق نیشتمانا خوەی نیشتمان بوو. داڵگێگ ک هەنای وێنەگەم گرتە دەسەو، ئرمێس ئەو دۊ چەوێ نەکەفێد و دڵێ نەڕپێد! داڵگێگ ک کڕ وە کڕ دەسەیلێ بنەدە بان فەرش دڵم تا لەوای نەخش نیشتمانەگەمان وە عەرش بڕەسێ! داڵگێگ لەوای ت، ک شێعر ئڕام هەڵوەسێ، لاوە لاوە ئەڕام بکەد تا لەوای من و گشت هاوقەتار و هاوسەنگەرەیل تر لە داوان نیشتمانا لێز بگریمن. ت نیەزانی داڵگد چۊن بۊەسە دەنگ هاوار عشق ئێ ڕووژژەیل وڵاتە! وەلێ من زانم ک زانید گشت داڵگەیل ئێ نیشتمانە، لەی ڕووژەیلە گشت داڵگەیل نیشتمان وە تەنیا هان وەگەرددا! وەگەردیەکابۊن داڵگانەی ک دڵِ رووڵە شۆڕشوانەگەی گرتێیەسە دەسەو تاگەرێ بێ‌دەنگیی بێ مانای زڵم و ستەم بشکنێد. ئێ وەگەرد یەکابۊن تایبەتیەی تنە پیرووزە، شەهید جاویدان و هەمیشە زینێیەگەی وڵاتم.
