پلاتفۆرم یارسان: پشتیوانیمان لە هنەرمەن خاتوو ڕووبار ڕەشید دەربڕیمن

پشتیوانیمان لە هنەرمەن خاتوو ڕووبار ڕەشید دەربڕیمن 
بێ ژن نە ژیان هەس و نە ئازادی 

هەلەێوا ک خەڵقمان ئاگادارن لە مانگەیل دۊایی هێرشت و هەڵامات لە سەر ناوچەیل یارسان نشین لە پارێزگایل دیالە و کەرکووک لە لایەن هێزەیل ترۆریست فرەترە بۊیە و چەندین هاوڵاتیمان لەی ناوچەیلە گیان خوەیان باخت کردنە. ئەگەر لە ساڵەیل سەرەتایی دامەزراندن داعش ک ژیان کوومەڵگاێ کاکەیی لە ناوچەیل جێناکووک کەفتە وەر هێرشت، دڵنیا بۊمن ک دەس ئەی ڕێکخریاگ ترۆریستی ها لە کار، ئیرەنگە ک داعش دی هێز و توان جاران نەیرێ کەسێگ ناتوانێد وە دڵنیایی بۊشێد ک عامل ئەی کوشتارەیلە کییە و وە چە پلان و ئامانجێگ دەس وە ئەی کارەیل دڕندانە دەێدن. جێ باوەرگومانی نییە ک لە ڕووژەیلێگ ک گیان کوومەڵگاێ کاکەیی فرەتر لە هەر زەمان ترەک کەفتیەسە خەتەر و میدیایل ناوچەگە و جهانیش هۊچ گرینگایەتی وە بارودووخ خەڵقمان نادەن، ئەی ئەرکە ها وە سەر شان هەر کەسایەتیێگ لە کوومەڵگا ک وە یاوانن دەنگ خوەی لەوارەێ ئەی کارەساتەیل وە هۊر گشتی کوردستان و عێراق و جهان ئاگاداری بدەێد. ئێکەش ژنان کوومەڵگاێ کاکەیی جوور شاروەندەیل ترەک هەم خاوەن ماف و هەمیش خاوەن ئەرکن ک لە ژیان خوەیان و کوومەڵگایان وە هەر ئامرازێگ وەرگری بکەن و گووش جهان وە هاوار بەرز خەڵق کاکەیی ئاشنا بکەن. 

لە ڕووژەیل دۊایی ژن هنەرمەن یارسان لە کوومەڵگاێ کاکەیی، خاتوو «ڕووبار ڕەشید» گوورانیێگ وە زاراوەێ کوردی ماچوو (گوورانی) چڕیە و بڵاو کردیە ک قسە لە کوشتار نامرۆڤانەێ خەڵق کاکەیی وە دەس خۊنمژەیل وابەستە وە زلهێزەیل کەێد و وێنەێگ لە ستەمێگ ک وە پەیرەوان دین یاری چوود وە خەڵقمان و خەڵقەیل ترەک نیشان داس. وە داخوە کەسانێگ ک خوەیان هۊچ هەنگاوێگ ئەڕاێ کرداری کردن ئەرک کوومەڵایەتیان هەڵنەگردنە و هەست بەرپرسیاربۊنیان سڕیاس، وە خوەیان ئجازە دانە سووکایەتی و بێ حرمەتی وەی ژن هنەرمەن کورد بکەن. گەنتر ئەوەسە ک ئەی کەسەیل وە خوەیان ئجازە دانە ک لە سووکایەتی خوەیان قسە لە باوەڕەیل دین یاری بکەن و خاتوو ڕووبار ڕەشید وە خاتر ئەوەێکە وە ئەرک کوومەڵایەتی خوەی چۊ مرۆڤێگ و چۊ ئەندامێگ لە کوومەڵگاێ کاکەیی یارسان عەمەڵ کردیە، وە بێ حرمەتی وە ئایین یاری تۆمەتبار بکەن! نووڕینێگ وە مێژووێ دین و ئایین، نە تەنیا دین یاری بەڵکو گشت دینەیل جهان نیشان دەێد ک هەمیشە هەر دو لایەن شەڕەیل ئایینی داواێ ئیە داشتنە ک نوانەر ڕاسەگانی ئایینەگەن و هەمیشەیش خیانەتکەرەیل وە ناو دین، خیانەت وە دینەگە کردنە. دین یاریش وە تایوەت لە چەن دەهەێ وەرین ک دیسکۆرسەیل تازەێگ هاتیەسە ناو کوومەڵگاێ یارسان لەی شەڕەیلە بێ بەش نەمەندیە و کەسانێگ پێیا بۊنە ک دێرن وە داواێ پاراستن دین تێشە وە ڕێشەێ دین یاری کوتن. چشتێگ ک ئەڕاێ ئیمە جێ باوەرگومانی نییە، ئەوەسە ک لە کەڵام یاری وە ئاشکرایی و ڕووشنی لەباوەت ماف یەکسان ژن و پیا قسە کریاس و ڕۆل ژن هەم لە دیسکۆرس دینی و هەمیش لە مێژووێ کوومەڵگامان ئەوقەرە پڕڕەنگ و دیارییە ک توانیمن وە دڵقورسی بۊشیمن ئەی کەسەیلە هانە ژێر کاریگەری دیسکۆرس دینەیل ترەک و یا دێرن ئەرزشتەیل کوومەڵایەتی پیاوسالاری وەگەرد کەڵام یاری تێکەڵەو کەن و ناتوانن ئەی دوانە لە یەکەوە جیا بکەن. 

ئێمە جوور پلاتفۆرم یارسان لە چالاکی هنەری هنەرمەنەیل یارسان، وە تایوەت خاتوو ڕووبار ڕەشید پشتیوانی کەیم و چۊ بەشێگ لە کوومەڵگاێ یارسان هاوڕایی خوەمان وەگەرد ژنەیل کاکەیی دەربڕیمن. ژنەیل کاکەیی لە یەی لا هانە ژێر گووشار بناژووخوازەیل دینی و ستەم دەوڵەتەیل و لە لاێگ تریش کەسانێگ وە ناو دین وەلێ وە پێچەوانەێ کەڵام یاری توان پەراوێزیان بکەن و ماف بەشداری لە کوومەڵگا لە لێیان بسیننەو. بەرز کردن دەنگ دژ وە هازەیل ترۆریست هەم ماف و هەم ئەرک گشت تاقەیل کوومەڵگاس و لە هنەر ڕووبار ڕيشید بجگە هەست بەرپرسیاربۊن چشتێگ تر نەۊنریەێد. هەروەها پاراستن زوان داڵگی، زوان گووران یا ماچوو، ک زوان شارستانیەت گوورانە و وە ئەنقەس یا وە خاتر کەمتەرخەمی دەسەڵاتدارەیل لە پسا لە ناو چوود، ئەرکێکە وە سەر شان هەر تاق کوومەڵگا ک هنەرمەن ڕووبار ڕەشید وە هەست ناسک خوەی لە ڕێگاێ پارێزکردنی هەنگاو هەڵگرتیە و دەس وە پاراستن ئەی میرات پڕبایەخە داس. لە کەسانێگ ک گووشیان هەمرای هووکارەێ دەنگ ژنەیل کوومەڵگاێ یارسان نەیۊە، داوەت کەیمن ک لاوەلاوەیل داڵگەیلیان وە هۊرەو بارن، و بزانن ک بێ دەنگ ژن و بێ بەشداری کردن ژنان لە کێشەیل سیاسی و کوومەڵایەتی جهان ئێمە جوور جهان ژێر دەسەڵات داعش سیەدێزە و تیەریک بوود و ئەوجوور جهانێگ هۊچ وێنەیەتی وەگەرد باوەرەیل یاری و جهان پڕ لە پرشەێ نۊر و دەنگ ئنسان و هاژەێ ئاو و تریکەێ تەمۊرەێ یارسان نەیرێدن. ئەگەر خاس وە مێژووێ ژنەیل یارسان بنووڕیمن، دۊنیمن ک هۊچ دەورەێگ بێ ژن نەوەسریاس و هۊچ ئاراێگ بێ دەنگ ژن نەیۊە، خاستر ئەوەسە ک کاریگەری پیاوسالاری وە حساو دین یاری نەنۊسیمن و بزانیمن ک ئەگەر ژن نەود نە ژیان هەس و نە ئازادی. 

پلاتفۆرم یارسان 

لینک بەیننامەی پلاتفۆرم ئەڕا پشتیوانی لە خاتوو رووبار رەشید
https://www.yarsan.info/?p=924

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *