چوار ئاپریل ئەڕا گەل کورد و خەڵکەیل ژێردەس لە رۆژهەڵات ناوین، نماد تێکۆشان ئازادی و ڕزگارییە لە ژێردەسی

لە وەختێگا وجوود گەل کورد جوور گەلێک خاون دیرۆک و فەرهەنگ لە کوردستان و ناوچەگە لە لایەن داگیرکەرەیل ئنکار کریا، ڕابەر ئاپۆ لە کوردستان بیە بەیداخ هەڵگر ئازادی و وە خوەندنەوەی فەلسەفی خوەی ئەڕا رویداوەیل کوردستان و هۆکار شکست جمشتەیل کوردی، جم خستە گیان شۆڕش کوردستان. هەر وە ئەی بوونەوە گەل کورد رۆژ لە داڵگبین رابەر ئاپۆ وە رۆژ ژیانەوە لە کوردستان ناو بەن.  

تێکۆشان و پاوەگەزدان سەرۆک ئاپۆ جوورێگ لە ئیرادەی شۆڕشگەری لە لای ئنسان کورد دروس کرد ، کە دی تەسلیمیەت و بندەستی قەبول نەکەی و لە راسای  ئسپات وجوود خوەی هەنگاو کرداری هەڵگرێ. سەرۆک ئاپۆ زەمانێگ هەنگاو ئەڕا ئازادی گەل کورد هێز دا وەت: کوردبین سەختە ، بەڵام دەوین لە دەستێ نامەردییە. ئەو تا ئیسە شان داسە ژێر بار گران شۆڕش و کوردایەتی و وە گەلەگەی ویشی: شۆڕشگەر راسەکانی بایەد تا ئاخرین هەناسەی زنەیی مەیدان تێکۆشان چۆڵ نەکەی. 

سەرۆک ئاپۆ لە دەسپێگ تێکۆشان خوەیان نەخش ژن لە دڵ تاریخ و شارستانیەت کورد و کوردستان تاوتوێ کرد و ئەڕا کۆتایی هاوردن وە دیاردەی پیاسالاری ، زانست ژنۆلۆژی کردە بنەوای تیکۆشان جمشت ئازادی لە کوردستان ، وە جوورێگ ک ئیمرۆژە ژنەیل بینەسە خاون نەخش بنەوایی لە تیکۆشان جمشت ئازادی.  

لە رۆژ ٤ ئاپریل لە سەر بنەوای فکر و فەلسەفەی رێبەر ئاپۆ ، پارت ژیان ئازاد کوردستان پژاک ، جوور جمشتێگ تازە و خاون پرۆژە و بەرنامەی شۆڕشگەری لە داڵگ بوی. جەوانەیل و خوەندکارەیل رۆژهەڵات کوردستان توانستن وە ئستفادە لە خەت فکری و ئیدۆلۆژی سەرۆک ئاپۆ ، ئومید تازەیگ بوەخشنە شۆڕش رۆژهەڵات کوردستان. پژاک لە ماوەی ١٦ ساڵ تەقالای بێ وچان  خوەی لە سەر بنەوای هێڵ سێیم تیکۆشان هەر لە ماکۆ تا ئیلام جەوانەیل سازماندەیی دا و پرۆژەی شۆڕشگەری گەل پێش خست. ئیمرۆژە دەستە دەستە لە جەوانەیل وڵاتپارێز رۆژهەڵات کوردستان  لە چوارچوو خەت تێکۆشان پژاک بەشداری لە جمشت ئازادی کوردستان کەن. فەلسفەی تێکۆشان رێبەر ئاپۆ مەرز لە ناوین گشت پێکهاتەیل کوردستان هەڵگرد و گشت باوەرمەندەیل ئایینی و فەرهەنگی لە چوارچوو پرۆژەی نەتەوەی دموکراتیک رابەر ئاپۆ بەشداری لە تێکۆشان ئازادی کەن. وە تایبەت کۆمەڵگەی یارسان کە بەردەوام لە لایەن داگیرکەرەیل و دەسڵاتدارەیل لە ماف خوەیان بێبەش کریانە، فرەتری لە هەر چین و پێکهاتەێگ لە کوردستان توانن لە چوارچوو پرۆژەی کۆمەڵگای دموکراتیک تێکۆشان بکەن و وە مافەیل خوەیان بڕەسن. 

ئیمە جوور دەستەی وەڕێوەبەری پلاتفۆرم یارسان  رۆژ لە داڵگبین ڕابەر ئاپۆ و ساڵڕۆژێ دامەزرانن پارت ژیان ئازاد کوردستان بمارک کەیم ویشیم: چوار ئاپریل ئەڕا گەل کورد و خەڵکەیل بندەست لە رۆژهەڵات ناوین، نماد تێکۆشان ئازادی و ڕزگارییە لە بندەستی . 

دەستەی وەڕێوەبەری پلاتفۆرم یارسان