پلاتفۆرم هۆرام و یارسان: هەشت مارس وە ژنەیل هۆرامان و یارسان پیرووز بوود

بەیاننامەی پلاتفۆرم هۆرام و یارسان وە بوونەی رووژ ژن:

هەشت مارس وە ژنەیل هۆرامان و یارسان پیرووز بوود

هەشت مارس یانێ رووژ جەهانی ژنەیل، رووژ ویرخستن ویەردەێگ پڕ لە نابەرابەری و گووشەگیرکردن نەخش ژن لە کوومەڵگاس. لە لاێ ترەک ئەی ڕووژە، ڕووژ وساین و پاوەگەزداێن هەزاران ژنە ک لە هەزاران ساڵ تا وە ئمڕووژ ئەڕاێ یەکسانی و ئازادی سەر نەچەماننە و درێژە وە خەباتیان دانەسە. لە وەختێگ ۸ مارس وە وێر تێریم ک لە ژێر سایەڕ تێکووشانەیل شەڕڤانەیل و گەریلایل لە رووژاوای کوردستان، سیستم ئنسانی بیەسە همێ و ئمێدێگ ئەڕا گەلەیل بن دەس و وە تایوەت ژنەیل جەهان. ئەو ژنەیلە نیشان دان ک ئەیەر سیستەمێگ یەکسان و ئازاد وە دی باێد، توانێ جەهانێگ ئارامتر و یەکسانتر ئەڕا ئنسانەکان رێک بخەێد. وە دواێ قارمانێتی ژنەیل کورد، هەستیاری وە نەخش ژن لە ڕێکخستن کوومەڵگە و ڕەسین وە ئازادی لە فرەتر بەشەیل ژیان خەڵقەگەمان ئەوزینە کردیە.
کاریگەری شۆرش رووژئاوای کوردستان لە بان بەشەگان تر کوردستان رۊن و ئاشکراس، دڵنیایمن ک بۊچکتەرین فورسەت ئەڕا ژنەیل رووژهەڵات کوردستان وە تایوەت هەرێم هۆرامان و یارسان جوور بەش دەوڵەمەنێگ لە دیرووک یەکسانی، ئازادی و نەخش ژن لە وەڕێوەبەری کوومەڵگە، جارێ تر توانێد یەخبەنان زاگرۆس وە بەشداری ژن بتاونێدوەی و بوودە سەنگەر ئازادی ئەڕا رووژهەڵات و ئێران.
ژنەیل هۆرامان و یارسان تا وە ئمڕووژ درێژەدەر فەرهەنگ ژیان ئازاد و یەکسان بۊنە و لە دەوڵەمەنی ناوچەگەیان نەخش تەیوەتێگ داشتنە. لە ناوچەی گووران دیرووکی فەلسەفە و باوەرەیل یارسان ک وە سەر بنەماێ یەکسانی و هەرەوەزییە، تا وە ئمڕووژ دەسپێشخەری ژیان زاگرۆس نشینەیل کردیە. بەشداری ژنەیل لە کار و بار رووژانە، ئابووری، سیاسی و هونەری نیشانەی ئی راسیەسە ک هەمرای لە هەرێم گووران دیرووکی لە ناو دڵ هۆرامیەیل و یارسانیەگان دۊنیمنەی. جوور پلاتفۆرم هۆرام و یارسان جگە لە پیرووز وەتن رووژ جەهانی ۸ مارس وە ژنەیل هۆرامی و یارسان، ئاوەختیمان ئەوەسە ک ژنەیل ئی هەریمە ئەڕاێ جارێ ترەگ لە رێکخستن کوومەڵگا ئەڕا رەسین وە ژیان ئازاد و یەکسان فرەتر لە جاران نەخش داشتوون. دیرووک نیشان داس هەر وەختێگ ژن نەخشێگ نێاشتیە کوومەڵگە و ژیان، هێمنی و ئارامی، یەکسانی و ئازادی وە خوەیەو نەییە.
وەڕێوەبەری پلاتفۆرم هۆرام و یارسان
۲۰۲۰-۰۳-۰٥