وە بێ کرماشان، کوردستان دی چوەس!
وە بێ کرماشان، کوردستان دی چوەس!؛ ڕێوار ئاودانان ئەندام شەوراێ ڕێوەبەریی پارت ژیان ئازاد کوردستان پژاک
سڵام و دوروود وە گەل شووڕشگەر کرماشان و ئیلام و خورماوە و کۊەشت و ئەسەدئاباد و ئاودانان و دیلڕان و گشت زاگرۆسنشینەیل ک لەی ڕووژەیلە هاوشان وەگەرد گەلان ترەک ئێران، ئەودژ دیکتاتۆری و ستەم ئەڵسیانەسە سەر پا و دەنگ ئازادیخوازانەێ خوەێان بەرزەو کردنە.
کوومار ئسڵامی ئێران هەم لە دەیشت و هەم لە ناو خوەێ بێئاز و شەکەت بییە و ڕووژ وە ڕووژیش فرەتر ئمێد خوەێ وە بانان ژە دەس دەێد. یەکگرتن و هاودەنگیی کورد و لوڕ و فارس و عەرەب و گیلەک و ئازەری و بەلووچ تۊەنێ ئەڕا هەمیشە کووتایی وە ئی دیکتاتۆرییە بارێد. دمۆکراسی، ئازادی، ژیان کرامەتدار و نان، حەق مەردمن و ئەڕا ڕەسین وە ئی حەقەیلە تەنیا ڕێ، دریژەدان وە خەبات و تێکووشانە.
ئی ئێعترازەیلە دریژەدەر شووڕش «ژن ژیان ئازادی»یە و بێگومان دۊاجار گەل کورد و گەلان ئێران وە گشتی لە وەراوەر ڕژیم دیکتاتۆر سەرکەفن.
کرماشان و ئیلام لە شووڕش «ژن ژیان ئازادی» لە ڕزگ نوا و پێشەنگ ئی شووڕشە بۊن. لەو سەرهەڵدانەیلە، کرماشان و ئیلام لە ڕووژەیل تەنگی ئەڕا تەنیا نەمەنن جوانڕۆ و مەهاباد و سەقز و ئورمیە هاتنە مەیدان. ئمڕووژ ک کرماشان سەرقافڵە و دەلیلەێ شووڕش ڕووژهەڵات کوردستانە، حەقە ک شارەیل ترەک کوردستانیش بانە هانا و کرماشان وە تەنیا نەیلن.
وەداخەو ڕاگەیاندنەیل کوردی هە جوور حزبەیل کڵاسیک، لە وەراوەر کرماشان و ئیلام و هەمەدان و لوڕستان کەمترخەمن. چۊنکە چشتێگ وەناو «ڕاگەیاندن نیشتمانی و دمۆکراتیک کوردستانی» نەیرێمن. زاراوەگەرایی و مەنتەقەگەرایی و حزبگەرایی گشت ڕاگەیاندن کوردی تۊش ناخوەشی کردێیە. ئەگەر چشتێگ لە ئاوایی بۊچگێگ لە سنە و مەهاباد یا هەولێر و سلێمانی بقوومیا ئیسە ڕاگەیاندن کوردی دونیا کاس کردۊد ئەما چۊن ئیسە باس کرماشان و ئەسەدئاباد و کۊەشت و ئیلامە، چمانێ نقێیان بڕینە!
تا ئێ ساتە لە ئێعترازات و سەرهەڵدان مەردم ئێران، نەتەنیا پشتگیری لە کرماشان و مەردم شووڕشگەر کرماشان نەکریاێە، تەنانەت بڕێگ کەس ک سەر وە حزبەیل دماکەفتگ کڵاسیکن، دەس دانەسە دژایەتیکردن کرماشان و تووان ناو کرماشان ڕەش بکەن! ئێ کارەیلیشە لە ژێر بەرگ ناسیۆنالیزم کوردی کەن! ئۊشن: ئەڕا کرماشان وەل تاران هاودەنگ بۊە و دژ وە کوومار ئسڵامی سەرهەڵداس؟! قسەێ ئێ جەماعەتە دی لۊتکەێ گەوجبۊن و بێئاوەزییە! ئێ جەماعەت لۊتبەرزە ک سەدساڵە بێجلە شکست هۊچ دەسکەفتێگ ئەڕا گەل کورد نیاشتنە، نە چشتێگ لە کوردەواری و نەتەوەبۊن زانن و نە چشتێگ لە سیاسەت و ژئۆپۆلتیک. ڕووژێگ باس لە یە کەن ک هەوەجەس زاراوەێ کوردیی کەڵهوڕی لەناو زاراوەێگ ناوەندی بسڕن و ڕووژێگیش تووان سەرهەڵدان دمۆکراتیک گەل کرماشان بەنە ژێر پرسیار!
گەورەشار کرماشان، ناوەند ڕووژهەڵات کوردستانە و چارەنۊس سیاسیی کوردەیل لە کرماشان دیار بوود. ئیسەیش کرماشان پێشەنگ سەرهەڵدانە و دەنگ ئازادیخوازیی کوردان لە سەراسەر ئێران بەرزەو کردێیە. کرماشان و ئیلام وە ئەو ئەندازە ک کوردستانین هەر وە ئەو ئەندازە وەگەرد ئەودۊاێ گەلان ئێران هاوچارەنۊسن. ئەڕا یە، هاودەنگبۊن کرماشان و ئیلام و مەڵوەنەیل لوڕستان و هەمەدان وەگەرد تاران و ئسفەهان و یەزد و شیراز کار سیاسیی فرە دورس و عاقڵانەێگە.
ئەوانە ک بێڕێزی و بێحۆرمەتی وە کرماشان کەن، خیانەت وە گەل کورد کەن. کرماشان دووس و دژمن خوەێ خاس ناسێد و لە هۊرێ نیەچوو ک لەی ڕووژەیلە کێ دووس و کێ دژمنێ بۊە. ئەوانە ک ئمڕووژ بێڕێزی وە کرماشان کەن بایس بزانن ک لە بانان فرە نزیکێ لە گەل کورد و کرماشان چەپاڵە خوەن.
